Pokeguide 話 MTR 抄佢哋,諸位小心炒車

蛋糕想說的是:

喂啊,人哋 MTR 喺 2015 年已經搞緊,Pokeguide 2016 年先去 MTR 總部做 pitching,慘就慘在人哋唔方便同你「交代」囉。蛋糕明嘅,送埋上門人哋都唔要係好難受,但事實都要講清楚,OK?

利申:作為前 MTR 公關同 MTR Service Update 嘅紙板公仔(喂),其實蛋糕唔多想幫 MTR,但今次 Pokeguide 咁樣講嘢實在有欠公允(Pokeguide 官方 FB),蛋糕又講一講自己知道嘅 Story,嚟個公道啲嘅評論。以下評論屬個人意思,唔代表其他任何組織/法人/政府嫁!如果資料有誤,歡迎報料話我知,盡快去改!

▲ Pokeguide 官方 FB 回應港鐵手機 App「功能抄襲」嘅截圖(13 Sep 2017, 2329 hours)

MTR 官方 FB 嘅回應(14 Sep 2017, 1207 hours)

首先真係要讚一讚 Pokeguide 團隊,因為佢哋真係同個 brand 個名一樣咁醒目,揀咗喺夜晚最多人上 Facebook,但 MTR 啲公關們(過咗夜晚 11 點)放工又「睡睡了」嘅時間,出一篇近乎指控 MTR 抄襲佢哋喺 2016 年向 MTR 做 pitching 嘅 Facebook 帖文。

Pokeguide 咁樣做,一來件事可以發酵到好盡,二來 MTR 都度唔切回應,畢竟要出一個 Facebook Post 呢,薯仔 draft 完又要 manager 做 review,之後個 Senior Manager 又要睇,佢老闆又可能要睇睇,仲要問埋隔離部門(好似 Marketing 嗰邊)攞 facts 返嚟砌篇嘢都要啲時間。所以喺度真係要讚吓 MTR,(相比起狗狗單嘢嚟講)反應時間真係有進步到喎!

「站內搜尋」你估真係得 Pokeguide 有 Solution 咩…

▲ 消息人士提供嘅 MTR 內部測試手機 App 截圖

好啦,講返正題,就如 MTR 嘅回應所講,2015 年其實 MTR 內部已經有部門著手研究。而正確嚟講,係連啲訊號發射裝置已經裝咗喺月台,連 App 都砌埋添,直頭就好似上圖咁用得!而當年玩嘅係「到站提示功能」,簡單嚟講就係喺車站月台度 Set 一啲訊號發射裝置,當手機接收到就會顯示而家所在嘅車站,咁樣喺車度瞓都唔怕瞓過龍啦!其實 KMB 都有類似功能,不過用手機嘅 GPS 做定位咁解。

當然,其實呢個技術除咗可以用嚟做到站提示,仲可以做室內定位,而呢個功能,就係第二年(2016年)Pokeguide 介紹畀 MTR 嘅站內定位 Solution 啦!但呢個世界唔止 Pokeguide 有識嘅 start-up 做呢樣嘢,大公司例如「用某啲蔬果做名」嘅公司都有 Solution,又好坦白講,如果唔係有啲咩 added value,點解要用你間細公司嘅 service?

▲ 消息人士提供嘅 MTR 內部測試 RFID 標貼定位截圖

題外話啦,其實 MTR 唔止想用手機經 Bluetooth(iBeacon)做室內定位,實際上 MTR 亦有同其他公司合作,做過用 RFID 標貼,經特製嘅手仗經接手機,為視障人士做站內定位,萬一有事仲可以 send 訊息同其他人求救!

有時真係唔怪得 MTR 唔大事宣揚,畢竟唔係貼完/裝完就一定 work,陣間早咗講又話 MTR 浪費公帑(都算係嘅)去搞埋啲唔 work 嘅嘢,搞掂晒先講又話慢,點都係 MTR 衰嫁啦(喂

「快捷出站」亦都唔係 Pokeguide 第一個搞

MTRush 於 Google Play Store 的介紹頁截圖

至於「快捷出站」呢,如果 Pokeguide 指責話 MTR 抄佢哋就真係有啲講唔通,畢竟呢個睇落唔太 User-friendy 但都好有用嘅 MTRush(Sorry 可能有啲直接) ,仲早過 Pokeguide 出現喺手機嘅世界。而家 Pokeguide 話點解 MTR 唔直接拎佢哋啲數據兼畀 credit 佢哋,反而要自己洗錢去做,仲話花費千萬去搞,你估真係成千萬就用嚟 mark 車門位置咩?

順便賣個廣告,其實 CityMapper 都有類似功能,前排同佢哋一齊做咗個訪問,有興趣可以睇吓!

Citymapper與民間組織分享資訊 港鐵有事 交通App即通知
https://tangoc.co/2xLzxeK

民間交通APP與港鐵非官方專頁合作 將推動態預報港鐵事故功能
https://tangoc.co/2goIMOI

仲有,蛋糕個人嚟講,其實唔多建議 Mark 埋車門號碼,香港人習慣背嘢,背咗個車廂同車門號碼之後,就會盡量諗計去嗰度等上車落車,咁樣只會搞到嗰度好迫,實際上又會拉長列車停站時間,搞搞吓可能每個鐘又少咗一班車。

當然,大家醒目嘅,自己執生啦,留返個距離電梯最短嘅車門位置,畀有需要嘅乘客更方便咁離開車站仲好啦。(大愛 Mode)

蛋糕:唔講唔講都係要同大家講,原因係…

喂啊,人哋 MTR 喺 2015 年已經搞緊,Pokeguide 2016 年先去 MTR 總部做 pitching,慘就慘在人哋唔方便同你「交代」囉。蛋糕其實明嘅,送埋上門人哋都唔要係好難受,但事實都要講清楚,OK?

(Visited 28,614 times, 1 visits today)