香港秋季電子產品展 2017 小筆記

蛋糕想說的是:

今年 2017 秋電展,感覺少咗好多 fancy 嘅產品,而初創企業嘅 ideas 同產品比較吸晴,踏實之餘起碼你會覺得個 Market 短時間內會肯受落,而唔係起碼等多一兩年先喺現實環境應用到。

一年一度嘅秋季電子產品展又嚟啦!

今年貿發局仍然喺會展搞秋電展,老實講,有啲攤位做 exhibit 嘅產品,一睇就知無乜新意,純粹喺已經 mature 嘅產品加少少新功能,然後又睇吓會唔會有公司肯買埋返去。時間關係,今次貿發局嘅朋友精選咗五間唔錯嘅參展商,睇睇佢哋啲新產品係點先!

Google Glass 唯一網上經銷商:數8科技(攤位 CH-P09)

自從 2015 年宣布 Google Glass 唔搞消費者版本,兼轉移到開發企業方面嘅應用之後,蛋糕差啲都唔記得咗佢。不過今日見返呢個 Google Glass 第二代,又好似無以前咁吸引了(喂)。

聽廠商介紹呢,佢哋係提供一套名為「Streye」嘅商業應用解決方案,利用 AR 技術去輔助日常生產需要。而廠商亦現場示範咗,點樣經個 Google Glass 做視像對話,見個畫面都算暢順,詳細可以睇睇 Streye 網站嘅介紹

▲ 現場示範點樣用 Google Glass 做視像通話

機械人 Aelos 識打關斗同跳舞(攤位 CH-H12)

可以用手機控制嘅機械人唔係新鮮事,不過啲關節咁靈活,仲可以打關斗嘅機械人就真心唔多啦!

呢款名叫 Aelos 嘅機械人,由深圳嘅「樂聚」研發,可以用電腦預先寫好 script,例如一啲跳舞同高難度動作,然後用手機操作,㩒個掣佢就可以邊播音樂邊跳舞啦!

當然,呢類機械人段估大家都唔會無啦啦買返屋企玩,所以通常都係做教育用途居多,有關 Aelos 機械人嘅資料可以睇睇呢度

【香港秋季電子產品展 2017 精選特色展商】機械人跳舞就見得多,不過細細隻又跳得流暢嘅,呢隻就做得唔錯啦!??#hktdcelectronicsfair

Cake Start 发布于 2017年10月13日

▲ Aelos 啲關節真係好靈活

續航力最長達 32 公里嘅平衡滑板 Surfwheel(攤位 CH-B05)

嗱呢個就堅係 Start-up 啦!

平衡車嘅原理應該好多人都知,其實都係靠內置嘅陀螺儀去調整滑板嘅平衡,然後用家可以前後滑動。不過呢個 Surfwheel 就好似平時踩滑板咁企,兼且做到好似滑雪咁靈活嘅轉彎,最高時速 18 公里,廠商聲稱可以連續玩 1 個鐘,行到 12 miles(約 19.3 公里),不過官網就話最長可以捱到 32 公里嫁!

重點係 surfwheel 其實係香港嘅 Start-up 嚟,如果有印象嘅話,呢塊平衡滑板仲喺電影《春嬌救志明》入面出現過添!

不過場地所限,無得 demo 一次,可惜!

健身教練伴你左右,「Move It」四合一智能健身(攤位 CH-D12)

平時嗰啲戴條手帶記錄吓郁咗幾多,又或者跑咗幾多就有用,但如果平時無乜時間做 Gym,但又想可以喺屋企做,兼有埋教學嘅話,另一間港產 Start-Up 嘅「Move It」四合一智能健身設備就應該啱用啦!

Move It 其實係靠一個智能手柄,配以跳繩、健腹輪、掌上壓支撐架同埋彈力繩去運作,而運動記錄會傳到手機上面,咁就可以邊睇示範邊做,做得好唔好都可以即時知道添!

【香港秋季電子產品展 2017 精選特色展商】用一對智能手抦,配搭唔同嘅配件,無線連接手機做fitness 超方便,一齊睇睇健身教練嘅示範!??#hktdcelectronicsfair

Cake Start 发布于 2017年10月13日

▲ 由健身教練示範吓 Move It 係點用啦!

Move It 而家喺網上都可以買到啦,售價係人民幣 1899,有興趣嘅可以喺呢度入手

魔鏡乜都話你知即時傳譯真心好玩(攤位 CH-M12)

今年 E-huge 參展,一入去就見到佢哋嘅 Smart Mirror,其實智能鏡都係一個內置 Android 系統同螢幕嘅玻璃鏡,加個鏡頭落去可以試吓唔同嘅妝,好似就無咩特別咁,而且外國早已自己改到有埋 Alexa 啦!

不過呢,佢哋另一件新產品就真心吸引,支援 28 種語言嘅語音即時傳譯,機仔細細但內置電池可以捱到一日,佢就係 Transay!

部機支援 4G 同 Wi-Fi 連線,要靠 network 去做翻譯,行 Android 系統,有埋錄音功能,內置 1,250 / 2,400 mAh。不過現時仲未賣街,話唔定之後去旅行租 Wi-Fi 蛋,加錢就借埋呢部機畀客,人人手拎一部出國,大概應該都解決到啲簡單旅行會話嘅!

(Visited 101 times, 1 visits today)