行街搵「Well井」免費有水飲,大前提係…

蛋糕想說的是:

試諗吓周街都有免費飲用水提供,的確係方便又環保,而且仲可以慳返啲錢添!香港本地社企「城泉」喺香港唔同地方設置「Well井」水機去提供過濾飲用水,大家有水飲之餘,又慳返個膠樽,場地提供者亦都可以賣吓廣告,一舉兩得!

前幾日(10 月 29 日)趁係公眾開放日,去咗香港貿發局喺博覽館搞嘅「國際環保博覽」,睇吓個市集有咩賣之餘,入去行個圈睇吓有無科技嘢八卦吓都好。

然後喺展場中見到下面呢部水機

▲ 「Well井」隻藍綠色真係幾 eye catching 嘅!

一問之下,原來係香港本地社企「城泉」搞出嚟嘅水機,佢採用 ARM 架構嘅 1.2 Ghz 四核心處理晶片組,顯示採用 1920 x 1200 10.1 吋高清螢幕,除咗基本的 Wi-Fi 連線功能,仲配備咗 7 個唔同功能的智能感應器,仲有喇叭添!

唔好睇佢機仔細細,其實入面個水箱都有 2L,放晒濾芯等等嘅組件,共重 40KG。

當然,水機就係水機,內置乜系統其實對個用家嚟講無影響,因為眼前都只係得一個出水掣,㩒住就有水出,僅是如此!

▲ 仲可以計吓有幾多人斟過水

公眾地方嘅水機,往往有啲人都唔敢用,擔心啲人會將個水樽口,甚至直接個口接觸水機嘅出水位置,造成衛生問題。有見及此,Well井 嘅出水口設計基本上算係隱藏咗,去水位嘅設計又容易話俾用家知,個出水口大約位置喺邊,方便放置水樽對準出水口。

Well井而家係以月租嘅形式,租畀學校、商場、公司等等嘅地方,佢哋會提供安裝,以及維修保養嘅服務。值得一提嘅係,例如濾水設備、去水位等等如果有問題嘅話,Well井 會透過 Wi-Fi 連線到「城泉」嘅伺服器,通知職員到場維修,十分智能!

唯一問題:方便 vs 環保

其實 Well井 既方便用家,又可以省卻場主嘅行政同維修成本,仲可以透過 Well井 個 Mon 賣吓廣告,又可以做埋 Social Responsibility,確實係 Win Win 嘅方案。不過對於唔少香港人嚟講,買支樽裝水都係 $10 以內,點樣去鼓勵多啲人自備水樽,真係一個幾頭痛嘅問題!

如果大家想支持吓 Well井 嘅話,不妨去銅鑼灣希慎又或者 The Good Lab 睇睇打個卡啦~

(Visited 147 times, 1 visits today)